Муовини Сарвазири мамлакат Усмоналӣ Усмонзода ба кашшофи асрори замин мукофоти давлатӣ супорид
5 сентябр дар арафаи ҷашни 32-солагии Истиқлолии давлатии Ҷумҳурии Тоҷикистон аз номи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сардори КВ «Экспедитсияи ҷустуҷӯию аксбардории геологӣ»-и Саридораи геологияи назди Ҳукумати Ҷумҳурии Тоҷикистон Беҳрӯз Шарифов барои фаъолияти пурсамари меҳнатӣ бо мукофоти давлатии Ҷумҳурии Тоҷикистон-медали “Хизмати шоиста” сарфароз гардонида шуд.
Дар маросими тантанавии супоридани мукофоти давлатӣ муовини Сарвазири мамлакат Усмоналӣ Усмонзода, роҳбарияти Саридораи геологияи назди Ҳукумати Ҷумҳурии Тоҷикистон ва кормандони Саридора иштирок карданд.
Муовини Сарвазири мамлакат Усмоналӣ Усмонзода кормандони Саридораи геологияро ба муносибати 32-солагии Истиқлоли давлатии Ҷумҳурии Тоҷикистон муборакбод гуфта, ин қадршиносиҳои Президенти мамлакат муҳтарам Эмомалӣ Раҳмонро подоши хизмати содиқона ба давлати соҳибистиқлоли тоҷикон маънидод намуд.
Зикр гардид, ки Истиқлоли давлатӣ дастоварди бузург дар таърихи сиёсии муосири миллати тоҷик маҳсуб мешавад. Аз ин рӯ, ҳифзи ин дастоварди муқаддас вазифа ва рисолати халқи шарифи Тоҷикистон, аҳли зиё ва тамоми шаҳрвандони баору номуси Ватан мебошад.
Ёдовар мешавем, ки соли гузашта дар арафаи 31-солагии Истиқлоли давлатӣ панҷ нафар кормандони соҳаи геология бо мукофоти давлатӣ сарфароз гардида буданд.
Маркази матбуот